Presidenti i Francës, Emmanuel Macron, ka bërë thirrje për një takim urgjent të Këshillit të Sigurimit të Kombeve të Bashkuara pas sulmeve të Shteteve të Bashkuara të Amerikës dhe Izraelit ndaj Iranit dhe hakmarrjes së Teheranit.
Macron theksoi se përshkallëzimi i situatës duhet të ndalet, pasi kjo përbën një rrezik të madh për paqen dhe sigurinë ndërkombëtare.
“Franca po kërkon një takim urgjent të Këshillit të Sigurimit të Kombeve të Bashkuara,” shkroi Macron në një postim në “X”.
Ai paralajmëroi se intensifikimi i konfliktit mund të sjellë pasoja të rënda dhe se kjo situatë kërkon ndërhyrje të menjëhershme për të shmangur një shpërthim të plotë të luftës mes Shteteve të Bashkuara, Izraelit dhe Iranit.
Macron gjithashtu njoftoi se Franca është e gatshme të angazhojë burimet e nevojshme për të mbrojtur partnerët e saj më të ngushtë, nëse ata e kërkojnë këtë.
Ai u shpreh se ka kontakte të ngushta me partnerët dhe miqtë evropianë të Francës në Lindjen e Mesme, duke theksuar se Franca ka baza ushtarake në rajon, përfshirë në Katar, Emiratet e Bashkuara Arabe dhe Jordani, të cilat u sulmuan nga raketat iraniane të shtunën.
