Miniera “Trepça” ka njoftuar për nxjerrjen e një kristali të jashtëzakonshëm nga thellësitë e nëntokës, me përmasa 1.40 metra lartësi dhe 1.20 metra gjerësi.
Sipas njoftimit zyrtar, ky formacion mineralogjik i rrallë u nxor në sipërfaqe falë përkushtimit dhe profesionalizmit të minatorëve të “Horizontit XI – Ndërrimi C”.
Miniera vlerëson se kristali përfaqëson më shumë sesa një pasuri natyrore ‘ai simbolizon traditën shekullore të minierës, punën e palodhur dhe shpirtin e pathyeshëm të minatorëve që çdo ditë zbresin në thellësi për të nxjerrë pasuritë minerare të vendit’.
“Me krenari të veçantë ndajmë me ju nxjerrjen e këtij kristali të jashtëzakonshëm nga thellësitë e minierës sonë, me përmasa mbresëlënëse: 1.40 metra lartësi dhe 1.20 metra gjerësi. Një falënderim i veçantë shkon për minatorët e Horizontit XI – Ndërrimi C, të cilët me profesionalizëm, përkushtim dhe guxim të përditshëm bënë të mundur nxjerrjen e këtij thesari natyror nga zemra e nëntokës së Trepçës. Ky kristal nuk është vetëm një formacion i rrallë mineralogjik – ai është simbol i punës së palodhur, traditës shekullore dhe shpirtit të pathyeshëm të minatorit të Trepçës. Respekt për çdo minator që çdo ditë zbret në thellësi për të nxjerrë pasuritë e vendit tonë”, thuhet në njoftim.
