Ministri i Punëve të Jashtme dhe Diasporës, Glauk Konjufca, ka zhvilluar një takim me Ambasadorin e Republikës së Turqisë në Kosovë, Sabri Tunç Angılı.
Sipas Ministrisë së Punëve të Jashtme dhe Diasporës (MPJD), në takimin njoftues pas formimit të qeverisë së re, Angılı ka riafirmuar përkushtimin e Turqisë për vazhdimin e partneritetit të ngushtë me Republikën e Kosovës.
Gjatë takimit u diskutua për progresin në bashkëpunimin dypalësh, nënshkrimin e marrëveshjeve që forcojnë lidhjet ndërmjet dy vendeve, si dhe mundësitë e shkëmbimit të vizitave në nivele të ndryshme.
“Republika e Turqisë mbetet një partner i rëndësishëm për Republikën e Kosovës dhe bashkëpunimi ndërmjet dy vendeve do të vazhdojë të thellohet në fusha me interes të përbashkët”, thuhet në njoftimin e MPJD-së./teve1.info/
