Policia e Kosovës ka zhvilluar të enjten një aksion të koordinuar kundër parkimeve të parregullta në qytetin e Prizrenit, kryesisht në zonën qendrore.
Në njoftimin zyrtar thuhet se, brenda vetëm dy orëve janë shqiptuar 106 gjoba për shkelje të rregullave të parkimit.
Aksioni u zhvillua në intervalin kohor 10:00 – 12:00, nga patrullat e Stacioneve Policore të Prizrenit, Prizren-Veri dhe Njësia për Rregullimin e Komunikacionit Rrugor.
“Parkimet e parregullta mbeten një sfidë e përditshme për qytetin e Prizrenit. Ato jo vetëm që pengojnë lëvizjen e lirë të automjeteve dhe këmbësorëve, por shpesh krijojnë situata të rrezikshme për sigurinë e qytetarëve. Policia është e vendosur të intensifikojë kontrollet dhe të ndërmarrë masa konkrete për të garantuar rend dhe siguri në komunikacion. Mu për këtë, sot më datë 27.02.2026, në intervalin kohor 10:00 – 12:00, patrullat e Stacioneve Policore të Prizrenit, Prizren-Veri dhe Njësisë për Rregullimin e Komunikacionit Rrugor kanë ndërmarrë një aksion të koordinuar kundër parkingjeve të parregullta në qytetin e Prizrenit, kryesisht në qendër të qytetit. Gjatë këtij kësaj kohë janë shënuar gjithsej 106 gjoba për shkelje të rregullave të parkimit.
Respektimi i rregullave të komunikacionit është çelësi për një qytet më të sigurt dhe më të rregullt”, thuhet në njoftim.
Policia apelon te qytetarët që të respektojnë rregullat e komunikacionit, duke theksuar se vetëm me sjellje të përgjegjshme mund të ndërtohet një Prizren më i sigurt, më i qetë dhe më i rregullt./teve1.info/
