Ministri i Punëve të Jashtme dhe Diasporës, Glauk Konjufca, ka zhvilluar një takim me ambasadorin e Francës në Kosovë, Olivier Guerot, ku u diskutua për forcimin e mëtejshëm të marrëdhënieve dypalëshe dhe thellimin e bashkëpunimit në fusha me interes të përbashkët.
Në fokus të diskutimeve ishte zgjerimi i bashkëpunimit ekonomik, rritja e shkëmbimeve tregtare, nxitja e investimeve, si dhe forcimi i lidhjeve kulturore dhe akademike ndërmjet dy vendeve.
Konjufca theksoi rëndësinë e vazhdimit të koordinimit me Francën për realizimin e objektivave ndërkombëtare të Kosovës, duke përfshirë avancimin e integrimit në Bashkimin Evropian dhe anëtarësimin në Këshillin e Evropës.
Ai gjithashtu e falënderoi Francën për mbështetje dhe partneritet, duke u shprehur i përkushtuar për thellimin e bashkëpunimit mes dy shteteve.
Nga ana e tij, Ambasadori Guerot e uroi Ministrin Konjufca për detyrën e re dhe rikonfirmoi gatishmërinë e Francës për të vazhduar partneritetin e ngushtë me Republikën e Kosovës.
