Njohësi i çështjeve politike, Artan Alijaj, ka deklaruar se familja Jashari është keqpërdorur vazhdimisht nga partitë politike sa herë që ato janë përballur me bllokada të shkaktuara nga vetë ato.
Sipas tij, përmendja e familjes Jashari ndodh kryesisht në situata krize politike, ndërsa në momentet kur partitë kanë pasur numrat e nevojshëm për të zgjedhur presidentin e dëshiruar, emri i kësaj familjeje nuk është përmendur.
“Nuk është hera e parë që në momentet kur arrihet në një bllokadë nga partitë politike, atëherë kërkohet shpëtimi te Familja Jashari. Në asnjë moment kur partitë politike kanë pasur koalicion dhe i kanë pasur numrat e mjaftueshëm, nuk e kanë përmendur familjen Jashari dhe kanë zgjedhur presidentët që i kanë dashur. Në momentet kur kanë ardhur në bllokada që i kanë shkaktuar vetë për mungesë të kulturës dhe debatit politik, e kanë përdorur familjen Jashari si një mënyrë për të dalë nga kriza, dhe e njëjta po ndodh edhe tani”, ka thënë Alijaj në emisionin “Info Nata” në Tëvë1.
Ai është shprehur i kënaqur me reagimet e Murat dhe Rifat Jasharit, të cilët kanë mohuar se kanë ndonjë qëllim për të garuar për postin e presidentit të vendit.
Sipas Alijajt, reagimi i tyre përbën një mesazh të qartë për partitë politike.
“Jam shumë i lumtur që është bërë një reagim sot, pasi që për një kohë të gjatë partitë politike kishin filluar ta përmendnin familjen Jashari, duke filluar nga LDK, PDK dhe së fundmi edhe Lëvizja Vetëvendosje. Më vjen mirë që u dha njëfarë leksioni partive politike se, pikësëpari, familja Jashari është e shenjtë për çdo shqiptar kudo që është dhe është mbi çdo parti politike dhe çdo proces politik artificial të ngritur nga partitë politike”, ka deklaruar ai.
Ndryshe, anëtarë të familjes së heroit të Kosovës, Adem Jashari, e kanë mohuar se kanë ndonjë qëllim për të garuar për president të vendit, pasi ministri i Jashtëm, Glauk Konjufca, tha të mërkurën se, nëse do të vinte një emër për president nga kjo familje, do të ishte një “konsensus automatik” në shoqëri.
Murat Jashari, djali i Rifat Jasharit, vëllait të Adem Jasharit, tha se nuk ka interesim apo qëllim për t’u bërë president i Kosovës, dhe se “ua kam bërë të qartë partive politike se cilat janë arsyet pse unë nuk e bëj, sepse mbi supet e mia rëndon një barrë e madhe”.
Ndërkaq, më vonë, edhe Bekim Jashari, ish-kryetari komunës së Skenderajt, në një përgjigje për teve1.info tha se ai mban qëndrimin e djalit të xhaxhait, duke shtuar “nuk kam çka t’i shtoj kësaj, asnjë pikë apo presje”./teve1.info/
