Politologu, Albinot Maloku ka vlerësuar se disa nga kushtet që ka vendosur kryeministri Albin Kurti lidhur me dialogun me Serbinë nuk gëzojnë mbështetje të mjaftueshme nga faktori ndërkombëtar.
Në emisionin “Këndi i Debatit” në Tëvë1, Maloku ka theksuar se kushti më i rëndësishëm për Kosovën, në rast të zbatimit, është dorëzimi i kriminelit të dënuar Milan Radoiçiç te organet e drejtësisë së Kosovës.
“Disa kushte që i ka vendosur Kurti për mua janë të shkëlqyeshme, mirëpo nuk kanë mbështetje nga faktori ndërkombëtar. Pesha më e madhe e kushtit më të mirë që mund t’i ndodhë Kosovës, nëse jetësohet, është dorëzimi i Radoiçiçit te organet e drejtësisë së Republikës së Kosovës. Megjithatë, konsideroj se Serbia, duke pasur parasysh praktikat e saj të mëparshme, sidomos rastet Karagjiq dhe Mladiç do të përpiqet ta shfrytëzojë këtë si kapital për veprime të tjera”, ka thënë ai.
Ai është shprehur i bindur se kryenegociatori i Kosovës, Glauk Konjufca do të sjellë një qasje më të mirë në dialog me Serbinë.
“Mendoj se Glauk Konjufca në çështjen e dialogut mund të ketë një shkëlqim të mirë për shkak të natyrës së tij si zbutës i shumë situatave. Besoj se ai do të jetë dora që do t’i shlyej disa premtime të mëdha të kryeministrit Kurti para opinionit publik”, ka theksuar Maloku.
Ndryshe, në takimin e fundit me emisarin e Bashkimit Evropian, Peter Sorensen , për dialogun Kosovë-Serbi, kryeministri Albin Kurti ka rikujtuar kushtet që kishte paraqitur më parë për rifillimin e bisedimeve.
Sipas komunikatës për media, Kurti ka theksuar se janë të rëndësishme: tërheqja e letrës së ish-kryeministres Ana Bërnabiq, dorëzimi i kryeterroristit Milan Radoiçiq, si dhe nënshkrimi I Marrëveshjes Bazike dhe Aneksit të Zbatimit./teve1.info/
