Krye-temë në vend po vazhdon të jetë çështja e presidentit.
E zyrtarisht kandidaturën edhe për një mandat e ka shpallë vetëm presidentja aktuale, Vjosa Osmani.
Por një emër tjetër po shihet opsion nga partitë politike në vend.
Sipas zëvendëskryeministrit të parë dhe ministrit të Punëve të Jashtme dhe Diasporës, Glauk Konjufca ky emër është nga familja Jashari.
“Që të gjithë e kanë konsideruar dhe është në konsensus të partive politike deri më tash, të vetmit emra që kanë shkaktuar automatikisht një pritje pozitive, një konsensus automatik në shoqërinë tonë, është një president nga radhët e familjes së nderuar Jashari”, ka thënë Konjufca.
Konjufca tha se mazhoranca ka 66 numra dhe nuk kanë dashur të mbështesin opozitën për muri me një emër.
“Dhe kjo në Kushtetutën tonë prej atyre që e ka konceptu në fillim, edhe që kanë marr pjesë në përpilimin e saj me siguri ideja bazike ka qenë që një mazhorancë e thjeshtë mos me pas garancinë që vet me zgjedh presidentin, por me qenë kjo një lloj i bashkëpunimit edhe me forcat tjera politike për me mujt me ardh te një numër i nevojshëm për zgjedhjen e presidentit. Pra, konkludimi është që përmes një emri të përveçëm na mos me mbështet për muri opozitën”, u shpreh tutje Konjufca.
Që është koha të tregojnë se a duan të jenë pjesë e politikës familja Jashari e thotë profesori, Mazllum Baraliu.
Por sipas tij, kjo nuk duhet të ndodhë.
Afati për zgjedhjen e presidentit të ri është deri më 4 mars.
