Franca i ka ndaluar ambasadorit të Shteteve të Bashkuara, Charles Kushner, takimin me ministrat e qeverisë franceze, pasi ai nuk mori pjesë në një takim në Ministrinë për Evropën dhe Punët e Jashtme në Paris.
Kushner duhej të paraqitej për të shpjeguar komentet e bëra nga administrata Trump pas vrasjes së fundit të një aktivisti francez të ekstremit të djathtë.
Në vend që t’i përgjigjej personalisht thirrjes së Barrot, Kushner dërgoi një zyrtar të lartë nga ambasada në vend të tij, duke përmendur angazhime personale, raportoi agjencia e lajmeve AFP, duke cituar një burim diplomatik.
Ministria e Jashtme franceze njoftoi vendimin të hënën, ndërsa marrëdhëniet diplomatike midis Parisit dhe Uashingtonit vazhdojnë të përkeqësohen për shkak të disa mosmarrëveshjeve, duke përfshirë tarifat tregtare, luftën në Ukrainë dhe rolin e Evropës në kundërshtimin e Rusisë, shkruan Al Jazeera.
“Në dritën e këtij dështimi të dukshëm për të kuptuar kërkesat themelore të misionit ambasadorial dhe nderin e përfaqësimit të vendit të vet, ministri (Jean-Noel Barrot) ka kërkuar që atij (Ambasadorit Kushner) të mos i lejohet më qasje e drejtpërdrejtë me anëtarët e qeverisë franceze”, tha Ministria e Jashtme në një deklaratë.
Ambasadori i SHBA-së mund të vazhdojë detyrat e tij diplomatike dhe të ketë “shkëmbime” me zyrtarët, shtoi ministria.
