Kryetari i Lidhja Demokratike e Kosovës, Lumir Abdixhiku, ka reaguar përmes një postimi në Facebook pas takimit të zhvilluar të hënën me kryeministrin e vendit, Albin Kurti, lidhur me procesin e zgjedhjes së Presidentit të Republikës dhe stabilitetin institucional në vend.
Abdixhiku ka theksuar se është thelbësore që Presidenca të mbetet institucion që garanton ndarjen e pushteteve dhe të shërbejë si faktor uniteti, e jo si vazhdim i shumicës qeverisëse.
“Procesi i zgjedhjes së Presidentit po zhvillohet brenda një afati të kufizuar kohor. Na kanë mbetur më pak se 9 ditë për të arritur një zgjidhje. Prandaj, në këtë kohë të shkurtër kërkohet përgjegjësi e lartë politike, e cila nënkupton qartësi, maturi dhe vullnet për kompromis, në mënyrë që të shmanget çdo rrezik për paqëndrueshmëri institucionale. Është thelbësore të kuptohet se Presidenca duhet të mbetet institucion që garanton ndarjen e pushteteve dhe shërben si faktor uniteti për vendin, e jo si vazhdim i shumicës qeverisëse”, ka shkruar ai.
Sipas tij, Lidhja Demokratike e Kosovës vlerëson se ekzistojnë dy rrugë të qëndrueshme përpara: një konsensus i gjerë parlamentar rreth një emri të përbashkët për President, ose një marrëveshje politike ndërmjet partive parlamentare.
“Në të dyja rastet, kërkohet mbështetja e së paku dy të tretave të deputetëve të Kuvendit të Kosovës; dhe ditët në vijim do të na tregojnë se cila rrugë do të jetë e mundshme. Nëse asnjëra, vendit i vijnë zgjedhjet, një skenar i panevojshëm në këtë kohë”, ka shtuar Abdixhiku.
Ai ka theksuar se LDK do të veprojë me përgjegjësi shtetërore, transparencë të plotë dhe vullnet për gjetjen e një zgjidhjeje, duke pasur si prioritet ruajtjen e stabilitetit institucional dhe interesin e Republikës së Kosovës./teve1.info/
