Një person është arrestuar në rajonin e Ferizaj, pasi gjatë kontrollit të pronës së tij janë gjetur dhe konfiskuar substanca të dyshuara narkotike, armë dhe mjete të tjera që ndërlidhen me veprimtari të paligjshme.
Sipas njoftimit zyrtar, njësitet e Policisë së Kosovës nga Drejtoria për Hetimin e Trafikimit me Narkotik kanë asistuar në një rast të dhunës në familje, ku ekzistonin dyshime edhe për posedim të substancave narkotike.
Me urdhër të Gjykatës dhe në prezencë të një dëshmitari, është realizuar kontrolli në pronën ku banonte i dyshuari me inicialet L.I.
Gjatë kontrollit, në cilësi të provave materiale janë sekuestruar: 86.7 gram substancë e dyshuar narkotike e llojit marihuanë; 4.7 gram substancë e dyshuar narkotike e llojit kokainë; 40.2 gram substancë e dyshuar marihuanë në formë çokollade; një pistoletë me gas me një karikator dhe 6 fishekë; 400 euro para të gatshme; dy telefona mobilë; një pako me letra për mbështjellje të narkotikëve dhe një peshore digjitale.
“Të gjitha veprimet lidhur me rastin, janë ndërmarrë në bashkëpunim me Prokurorinë Themelore Ferizaj, ndërsa me aktvendim të prokurorit kujdestar, pas intervistimit i dyshuari dërgohet në mbajtje”, theksohet në njoftim./teve1.info/
