Shkëndija është vetëm një hap larg një tjetër arritjeje historike në arenën evropiane – këtë herë jo vetëm sportive, por edhe financiare. Nëse kampioni nga Tetova arrin të eliminojë Samsunspor në fazën “play-off” të UEFA Europa Conference League, atëherë përfitimet sezonale nga UEFA do të kapin shifrën marramendëse prej rreth 7 milionë eurosh.
Nga paraqitjet e deritanishme në Evropë, që prej muajit korrik, Shkëndija ka arkëtuar plot 6 milionë euro nga fondet e UEFA – një shumë rekord për kushtet tona. Në këtë shifër nuk përfshihen të ardhurat nga të drejtat televizive dhe biletat e shitura për ndeshjet në shtëpi, çka e bën suksesin edhe më të madh në aspektin ekonomik.
Sipas skemës financiare të publikuar nga UEFA para nisjes së sezonit, kualifikimi në 1/8 e finales do t’i siguronte klubit tetovar edhe 800 mijë euro shtesë. Kjo do ta çonte totalin në afro 7 milionë euro – një shumë që përkthehet në rreth dy buxhete vjetore të klubit.
Edhe pse në letër Samsunspori konsiderohet favorit, opinioni sportiv beson se Shkëndija ka cilësinë, përvojën dhe karakterin për të kaluar edhe këtë pengesë. Fakti që ka arritur deri në këtë fazë të kompeticionit flet qartë për forcën dhe seriozitetin e skuadrës kuqezi.
Tani, gjithçka vendoset në dy ndeshje. Nëse Shkëndija arrin të shkruajë një tjetër kapitull të artë, përfitimi do të jetë i dyfishtë: lavdi sportive dhe stabilitet financiar për vitet në vijim.
