Përdorimi i telefonit gjatë drejtimit te automjetit shpesh është bërë një arsye më shumë për të mos i shpëtuar aksidentit.
E për këtë, policia rajonale në Ferizaj, të mërkurën filloi me një aksion.
Këta policë civil, po identifikojnë shoferët të cilët janë duke e përdorur telefonin.
Pas identifikimit ata po ndalohen dhe po iu shqiptohet gjoba kundërvajtëse.
Zyrtari policor tregoi numrin e gjobave të shqiptuara që nga fillimi i aksionit.
“Deri tash prej se kemi fillua në këtë aksion kemi shqiptua rreth 20 gjoba, çmimi i gjobës është 40 euro mirëpo sipas ligjit nëse vozitësi brenda 15 ditëve e paguan gjobën është 50 % e gjobës”, tha zyrtari policor Shefki Rexha.
E siç duket, ky aksion ishte mëse i nevojshëm.
“Zakonisht e përdori shumë dhe kam marr shpesh gjoba për përdorimin e telefonit, përgjithësi është shumë rrezik sepse kam pas dhe një aksident gjatë përdorimit të telefonit, prandaj ua kisha sugjerua të gjithëve mos me përdor telefonin”, tha shoferi Argjend Krasniqi.
Sipas zëdhënësit të policisë, Kanun Veseli ky aksion do të vazhdojë edhe në ditët në vijim.
“Polica në vazhdimësi ka bërë përpjekje në parandalim të aksidenteve edhe për këtë kundërvajtje, por ky aksion është edhe më i gjerë dhe po shtrihet në tërë rajonin e Ferizajt me 5 stacione të policisë, kjo kundërvajtje është një faktor kontribuues i aksidenteve në komunikacion”, tha Veseli.
Vetëm gjate muajit Qershor të këtij viti, në Ferizaj janë shkaktuar 87 aksidente si pasojë e përdorimit të telefonit, teksa janë shqiptuar 302 gjoba.
Raporti i gazetares Lendrina Kodrolli.
