Shala, i cili është në cilësinë e zëvendëskryesuesit të këtij Komisioni, tha se për këtë çështje kanë filluar grumbullimin e informacioneve.
“Ne kemi hartuar tash planin e punës, kemi filluar grumbullimin e informacioneve dhe dokumentacionit për periudhën të cilën mbulojmë si objekt hulumtimi… takimi i radhës do të jetë më 4 korrik dhe konsideroj që po hyjmë në fazën më të nevojshme për të marrë informacione të duhura dhe për të parë të vërtetën e lëvizjes së parasë, për të parë të vërtetën e arsyes mbi të cilën është ngritur çmimi i energjisë, për të parë të vërtetën a kemi pasur nevojë të blejmë apo kemi shitur energji, sa kemi blerë, sa kemi shitë, cilat kanë çmimet, kompanitë e kështu me radhë”, tha ai në “Ditari” në Tëvë 1.
Ai theksoi se ministri i parë që do të intervistohet më 4 korrik do të jetë nga Ministria e Zhvillimit ose ajo e Financave.
“Njëri nga ministrat sigurisht se do të jetë, ose Ministria e Zhvillimit ose Financave, mund të ndodh edhe dytë, por besoj që po”, tha Shala.
Me iniciativë të opozitës, veçmas të PDK-së, në fillim të muajt maj, Kuvendi i Kosovës ka formuar Komisionin Hetimor Parlamentar, lidhur me menaxhimin e krizës energjetike nga ana e Qeverisë së Kosovës, i cili udhëhiqet nga deputeti i LDK-së, Driton Selmanaj. /Teve1.info/
