Brenda gjithçka është e shkruar në gjuhën serbe.
E edhe punëtorët e këtij objekti të Fakultetit të Shkencave teknike në Mitrovicë të veriut janë nga komuniteti serb nga po kjo komunë.
Siç mëson tëvë1, ka edhe të atillë që kanë ardhur nga Beogradi.
Mirëpo kjo pronë po del të jetë e shfrytëzuar ilegalisht.
Kjo pasi e njëjta i takon Universitetit të Prishtinës, për çka para disa ditësh, këtij Fakulteti që menaxhohet nga serbët, i është dërguar një kërkesë.
Sipas asaj që ka mësuar televizioni, një vendim duhet të mirret deri në fillim të muajit mars.
Ish-kryesuesi i kuvendit komunal të Mitrovicës së Veriut, Nexhat Ugljanin thotë se kjo pronë padyshim se i takon UP-së.
“Sigurisht që është edhe prona e fakultetit, duhet me qenë juridikisht në pronën e fakultetit të Prishtinës, sigurisht që iu kanë afru ndonjë kontratë për qera edhe me ardhë në sistem të Republikës së Kosovës. Të shohim në të ardhmen”, thotë ai.
Ditë më parë, ambientet e këtij Fakulteti u shfrytëzuan nga Lista serbe, e cila mbajti një tubim me dhjetë komuna serbe.
Aty u miratua një deklaratë e përbashkët me gjashtë pika, në të cilat thuhet se integrimi i Arsimit dhe Shëndetësisë duhet të diskutohet në Bruksel përmes dialogut, Kosovë-Serbi.
I gjithë takimi ishte monitoruar edhe nga Policia e Kosovës në veri të Mitrovicës.
