Vetëm 150 minuta aktivitet aerobik në javë mund ta bëjnë trurin biologjikisht gati një vit më të ri, sipas një studimi të publikuar në Journal of Sport and Health Science.
Hulumtimi, i realizuar me 130 persona të moshës 26–58 vjeç, tregoi se ata që ushtruan rregullisht për një vit kishin ulje mesatare prej 0.6 vitesh në “moshën e trurit”, bazuar në incizimet me rezonancë magnetike (MRI).
Ndërkohë, tek pjesëmarrësit që nuk ndryshuan stilin e jetesës u vu re rritje e lehtë e moshës së trurit. Studiuesit theksojnë se edhe një ndryshim i vogël mund të ketë ndikim afatgjatë në ruajtjen e aftësive njohëse dhe uljen e rrezikut për demencë.
Ekspertët rekomandojnë aktivitet të rregullt fizik, si ecje 30 minuta në ditë, si një hap i thjeshtë por efektiv për shëndetin e trurit.
