U thirrën për seancë të jashtëzakonshme.
E brenda saj, u renditen shtatë pika për diskutime para deputetëve të Kuvendit të Kosovës.
Pesë prej tyre ishin për votimin e marrëveshjeve ndërkombëtare.
Dy prej tyre ishin për Planin e Rritjes së Bashkimit Evropian, në vlerë prej 882.6 milionë euro, si dhe tri marrëveshje me Bankën Botërore në vlerë mbi 120 milionë euro, që prej kohësh prisnin miratimin dhe kishin afat skadence.
E për to, shefja e grupit parlamentar të Vetëvendosjes, Arbërie Nagavci kërkoi edhe shtyrje të afateve procedurale.
Këtu, mori përkrahje nga të gjithë partitë opozitare.
Të gjithë marrëveshjet, morën dritën e gjelbër nga deputetët dhe u miratuan.
Por ata që abstenuan për secilën marrëveshje, ishin pesë deputetët e Listës Serbe.
Menjëherë pas kësaj, u kërkua shtyrje të procedurave edhe për Buxhetin e Republikës së Kosovës.
Për t’i bindur deputetët, doli ministri i Financave, Hekuran Murati.
Por këtu, nuk patën bashkëpunim nga deputetët opozitarë.
Nga Partia Demokratike e Kosovës kërkuan tri ditë kohë për leximin e buxhetit me 700 faqe.
Përveç saj, i pari i Lidhjes Demokratike të Kosovës kërkoi që të jetë edhe kryeministri Kurti në seancë për debat.
Si dy partitë tjera, kërkuan shtyrje të kësaj pike edhe Aleanca për Ardhmërinë e Kosovës.
Me dakordim të të gjithë subjekteve politike, seanca e së premtes u shty për të hënën në orën 10:00.
