Përfaqësuesit e platformës qytetare “Liria ka Emër”, Eliza Hoxha, Ismail Tasholli dhe Ridvan Emini, kanë bërë të ditur se të mërkurën janë pritur në takim nga Presidentja e Republikës së Kosovës, Vjosa Osmani, për të diskutuar rreth organizimit të Marshit qytetar “Drejtësi, jo politikë”, i cili do të mbahet më 17 shkurt në Prishtinë.
Sipas njoftimit zyrtar të platformës, Presidentja Osmani ka shprehur mbështetjen e saj për këtë nismë, duke theksuar rëndësinë e mbrojtjes së vlerave kombëtare.
“E mbështes këtë iniciativë qytetare. Vlerat kombëtare dhe ato të luftës për liri duhet t’i mbrojmë dhe t’ua përcjellim brezave të rinj si pjesë të krenarisë sonë kolektive,” është shprehur Presidentja Vjosa Osmani.
Nga ana e saj, Eliza Hoxha ka theksuar se mbështetja institucionale dhe shoqërore që po merr marshi dëshmon karakterin e tij qytetar dhe gjithëpërfshirës.
“Ky marsh është një thirrje për respektimin e drejtësisë së paanshme dhe për ruajtjen e dinjitetit të historisë sonë. Kur institucionet dhe qytetarët flasin me një zë për drejtësi, mesazhi bëhet më i fuqishëm,” ka deklaruar Hoxha.
Ndërkaq, Ismail Tasholli ka vlerësuar se 17 Shkurti përbën një moment që bashkon qytetarët rreth vlerave themelore të shtetit.
“Ne besojmë se drejtësia duhet të jetë e ndarë nga politika dhe në shërbim të së vërtetës. Më 17 shkurt, qytetarët do të japin një mesazh të qartë për unitet, dinjitet dhe respekt për sakrificën e lirisë,” është shprehur ai.
Platforma “Liria ka Emër” ka falënderuar Presidenten e Republikës për pritjen dhe mbështetjen, duke ftuar qytetarët që më 17 shkurt, në Ditën e Pavarësisë, të bashkohen në Prishtinë për marshin me moton: “Drejtësi, jo politikë”.
