E në qarkoren e parë buxhetore të lëshuar nga Ministria e Financave, Komisioni i Granteve ka vendosur që pozitat e lira në disa komuna mbi formulën shtetërore të arsimit para universitar të harmonizohen me komunat të cilat kanë mungesë të stafi.
E nga kjo, komuna e Fushë Kosovës përfitoi 156 norma të reja.
Drejtoria e Arsimit në këtë komunë e konsiderojnë këtë një vendim të vonuar.
“Konsiderojmë që kjo rritje është paksa e vonuar mirëpo është jashtëzakonisht e nevojshme. Urojmë që në qarkoren e dytë që do të vijë në fillim të muajit korrik të mos ketë ndryshime sepse ndodh shpesh herë që të ndryshohet numri i normave të lejuara”, tha Samir Shahini- drejtor i arsimit në komunën e Fushë- Kosovës
E për një vit të suksesshëm drejtori i shkollës “Mihal Grameno” kërkon rritje të stafit të mësimdhënësve.
“Në shkollën time janë 74 mësimdhënës por për vitin shkollor 2022/2023 më duhen 26 mësimdhënës dhe staf administrues ,zëvendës, mësues mbështetës dhe psikologë nuk kemi prandaj na duhen të gjitha këto diku rreth 38. Shkolla jonë ka probleme tashme e 16 vite me çështjen e normave, ndërsa lejimi i normave është me vështirësi nga ana e Ministrisë”, tha Ismet Gashi – drejtor i shkollës “Mihal Grameno”
Kurse njëri nga mësuesit e kësaj shkolle tregon vështirësitë që ata hasin gjatë zhvillimit të procesit mësimor.
“Kemi probleme si në klasën time dhe në klasa tjera, përgjithësi për të gjithë mësimdhënësit e shkollës sonë numri i nxënësve është i madh, minimumi është 43 nxënës në klasë, kemi vështirësi për të zhvilluar procesin mësimor”, shprehet mësimdhënësi Hamdi Halimi.
Numri i madh në klasa nuk po u pëlqen as nxënësve.
Kronika e realizuar nga gazetarja Lendrina Kodrolli
