Ministri në detyrë i Drejtësisë, Blerim Sallahu, ka deklaruar se Lëvizja Vetëvendosje ka numrat e mjaftueshëm për konstituimin e Kuvendit dhe formimin e Qeverisë, duke theksuar se partia e tij nuk është e interesuar për zgjedhje të reja, por për funksionalizimin e plotë të institucioneve të Kosovës.
“Numrat për Kuvend dhe për Qeveri i kemi dhe po na teprojnë, po më duket”, u shpreh Sallahu, duke shtuar se fokusi i LVV-së mbetet krijimi dhe funksionimi i institucioneve në mënyrë që të realizohet programi qeverisës.
Duke folur për integrimin e serbëve në institucionet e Kosovës, Sallahu tha se është i domosdoshëm një qasje më harmonike dhe më e kujdesshme, gjithmonë në përputhje me Kushtetutën e Kosovës.
“Ne jemi për garancione, jemi për integrim të serbëve në institucionet e Kosovës, por duhet të ketë një qasje më ndryshe, më harmonike dhe një vlerësim e përkushtim ndaj aktgjykimeve të Gjykatës Kushtetuese, në përputhje me vlerat e rrënjosura në Kushtetutën e Kosovës”, theksoi ai në emisionin “Ditari” në Tëvë1.
Sa i përket çështjes së zgjedhjes së presidentes, Sallahu paraqiti dy mundësi: arritjen e një marrëveshjeje politike ose ndjekjen e procedurës kushtetuese përmes mbledhjes së nënshkrimeve.
“Unë i shoh dy rrugë këtu. E para është që të ketë një marrëveshje politike, ku subjektet politike komunikojnë bashkë për të prodhuar një president konsensual. Rruga e dytë, që për mua është më e drejtë, është që secili kandidat të komunikojë me deputetë të caktuar, t’i marrë 30 nënshkrime dhe t’i nënshtrohet procedurës, sepse fryma e Kushtetutës për rolin e presidentit është ndërtuar në këtë mënyrë”, tha Sallahu.
Ai ritheksoi se LVV nuk është pro zgjedhjeve të reja, duke shtuar se kjo parti është e përkushtuar për krijimin dhe funksionalizimin e të gjitha institucioneve të Kosovës.
“Lëvizja Vetëvendosje nuk është për zgjedhje të reja. Ne jemi për krijimin dhe funksionalizimin e të gjitha institucioneve të Kosovës dhe po punojmë që këto institucione të realizojnë programin qeverisës që na pret”, përfundoi Sallahu./teve1.info/
