Dy persona janë arrestuar në Kaçanik, një mashkull nën dyshimin për përdorim të armës së zjarrit, ndërsa një femër për deklarim të rremë në Polici.
Sipas Policisë së Kosovës, mbrëmjen e së mërkurës është raportuar për një shkëmbim zjarri mes dy veturash në këtë komunë. Megjithatë, gjatë daljes në vendngjarje, njësitë policore nuk kanë hasur në dëshmi që do ta konfirmonin raportimin fillestar.
Pas zhvillimit të hetimeve, rreth dy orë më vonë, policia ka lokalizuar një veturë të braktisur dhe të vetaksidentuar, e cila kishte shenja dëmtimi të shkaktuara nga arma e zjarrit.
Në deklaratën e saj, e dyshuara femër ka pohuar se i dashuri i saj kishte shtënë me armë zjarri në drejtim të disa shtëpive dhe se, gjatë këtij veprimi, kishte plagosur aksidentalisht veten.
Ndërkohë, gjatë kërkimeve për të dyshuarin mashkull, policët e kanë vërejtur atë mbi kulmin e shtëpisë së tij, ku ai ka kërcënuar se do të kryente vetëvrasje. Pas negociatave nga zyrtarët policorë, i dyshuari është bindur të zbresë dhe është arrestuar.
Me vendim të prokurorit kompetent, i dyshuari është dërguar në mbajtje, ndërsa arma e zjarrit e llojit AK-47, që dyshohet se është përdorur në rast, është konfiskuar. Hetimet lidhur me rastin po vazhdojnë.
“Lidhur me rastin është arrestuar një dëshmitare femër kosovare e cila ka deklaruar se i dashuri i saj i dyshuari mashkull kosovar, ka shtënë me armë zjarri në drejtim të disa shtëpive të panjohura dhe aksidentalisht ka plagosur veten. Përderisa njësitë policore ishin në kërkim të dyshuarit , i njëjti ishte verejtur mbi kulmin e shtëpisë se tij dhe kërcënonte për të kryer vetëvrasje, ku menjëherë eprori policor ka negociuar me të dyshuarin dhe pas negociatave i dyshuari bindet të zbres dhe arrestohet, e me pas me vendim te prokurorit dërgohet ne mbajtje, ndërsa arma e zjarrit AK-47 që dyshohet të jetë përdorur në rast është konfiskuar”, thuhet në njoftim. /teve1.info/
