Ministrja në detyrë e Punëve të Jashtme dhe Diasporës, Donika Gërvalla, ka pritur sot në takim gazetarët nga Ukraina, të cilët po qëndrojnë në Kosovë në kuadër të projektit “Gazetarë në Rezidencë”, i mbështetur dhe financuar nga Qeveria e Republikës së Kosovës përmes MPJD-së.
Gjatë takimit, Gërvalla shprehu kënaqësinë për mbështetjen institucionale ndaj këtij projekti, i cili u ka ofruar gazetarëve ukrainas siguri dhe mbrojtje në Kosovë, duke u mundësuar njëkohësisht vazhdimin e punës së tyre profesionale.
Sipas njoftimit të MPJD-së, ministrja vlerësoi lart punën e përditshme të gazetarëve ukrainas, përkushtimin dhe qëndrueshmërinë e tyre profesionale, duke theksuar se mbrojtja e fjalës së lirë është pjesë thelbësore e mbrojtjes së vetë lirisë.
Ajo theksoi se Kosova mbetet një ambient mikpritës dhe një shtëpi e dytë për gazetarët ukrainas, duke çmuar kontributin e tyre në informimin e drejtë dhe të pavarur.
Po ashtu, Gërvalla rikonfirmoi qëndrimin e palëkundur të Republikës së Kosovës në mbështetje të Ukrainës në luftën e saj për paqe, liri dhe demokraci.
“Solidariteti i Kosovës me Ukrainën buron nga një përvojë e përbashkët historike dhe nga bindja se fjala e lirë dhe e drejta për të jetuar i lirë janë vlera të panegociueshme”, thuhet në njoftim.
Duke rikujtuar ngjashmëritë mes historisë së luftës në Kosovë dhe asaj në Ukrainë, Gërvalla theksoi se Kosova qëndron gjithmonë krah popujve që luftojnë për mbrojtjen e tokës dhe sovranitetit të tyre, duke e cilësuar Kosovën si shtëpi të dytë për gazetarët ukrainas, të cilët po hyjnë në vitin e katërt të qëndrimit të tyre në vend.
Në takim morën pjesë edhe kryetari i Asociacionit të Gazetarëve të Kosovës (AGK), Xhemajl Rexha, si dhe Flutura Kusari nga Qendra Evropiane për Lirinë e Shtypit dhe Medias (ECPMF), organizata këto që kanë implementuar programin.
Ata shprehën falënderim ndaj MPJD-së dhe Qeverisë së Kosovës për mbështetjen e vazhdueshme, duke e cilësuar programin si një nga më kredibilët e këtij formati në rajon.
Që nga viti 2022, në kuadër të projektit “Gazetarë në Rezidencë”, Kosova ka pranuar gjithsej 19 gazetarë nga Ukraina, prej të cilëve nëntë janë kthyer në vendin e tyre, ndërsa aktualisht në Kosovë qëndrojnë 10 gazetarë.
