Kryeministri në detyrë i Kosovës, Albin Kurti, ka pritur në takim ambasadorin e Republikës së Turqisë në Kosovë, Sabri Tunç Angılı, me të cilin kanë diskutuar për thellimin e mëtejmë të partneritetit bilateral ndërmjet dy vendeve.
Sipas njoftimit të Zyrës së Kryeministrit, gjatë takimit Kurti ka vlerësuar bashkëpunimin e deritanishëm, veçanërisht në fushën e sigurisë dhe mbrojtjes, si dhe rolin e rëndësishëm të Turqisë në misionin e NATO-s në Kosovë, përfshirë edhe komandën e KFOR-it.
Ai ka theksuar se bashkëpunimi në fushën e mbrojtjes do të vazhdojë edhe në të ardhmen, duke falënderuar ambasadorin Angılı dhe Republikën e Turqisë për gatishmërinë dhe partneritetin e vazhdueshëm.
Në takim është diskutuar gjithashtu edhe për marrëdhëniet në fushën e ekonomisë dhe tregtisë ndërmjet dy shteteve.
“Në këtë drejtim u diskutua për mundësinë e organizimit të një forumi të biznesit, i cili pas forumit të parë që u mbajt në Stamboll në qershor të vitit 2024, këtë vit do të mund të organizohet në Prishtinë”, thuhet në komunikatë.
Ambasadori Angıli e ka uruar Kurtin për fitoren në zgjedhjet e 28 dhjetorit 2025, ndërsa Kurti e ka falenderuar ambasadorin për takimin dhe komunikimin e vazhdueshëm, si dhe për ftesën e Republikës së Turqisë për pjesëmarrje në Forumin Diplomatik në Antalia.
