Më 2 shkurt, njoftoi që do të udhëheq drejtorinë e Kulturës, Rinisë dhe Sportit në Mitrovicë të Jugut.
Këtë pozitë aktivistit të Lidhjes Demokratike të Kosovës, Gazmend Asllanit ia besoi kryetari i komunës, Faton Peci.
Mirëpo ky emërim gati sa nuk e prishi koalicionin e arritur në Mitrovicë mes Vetëvendosjes dhe LDK-së.
Për këtë çështje, për orë të tëra u mbajt një takim mes kryetarit Faton Peci, dhe kryetarit të degës së LDK-së në Mitrovicë, Gëzim Plakolli.
Ky i fundit në një bisedë telefonike për Tëvë1, ka thënë se ndonëse emërimi i Asllanit në pozitën e drejtorit ishte veprim i njëanshëm, koalicioni nuk do të prishet.
“Rrezik nuk ka, jemi në negociata ka ndodhë nje lëvizje e një anshme e kryetarit Peci, pa marrëveshje tonë e ka emërua një drejtor dhe jemi tash tu e pa se si me zbutë këtë situatë. Është vlerësim i tij personal, drejtori ka qenë një kandidat i LDK-së për asamble, por nuk është emri që e kemi propozu si degë”, ka thënë Plakolli
Sipas Plakollit, takimet në mes tyre do të vazhdojnë dhe nuk janë mbyllur me kaq.
“Jemi duke i shoshitë, jemi tu diskutu me gjetë zgjidhjen edhe me vazhdu përpara për me i shërby qytetarëve të Mitrovicës”, u shpreh tutje Plakolli.
Televizioni ka provuar të marrë një qëndrim edhe nga kryetari i komunës së Mitrovicës së Jugut, Faton Peci por i njëjti nuk ka kthyer përgjigje.
