Pas konfirmimit nga delegatët për të vazhduar si kryetar i Lidhjes Demokratike të Kosovës, Lumir Abdixhiku ka bërë thirrje për unitet brenda partisë dhe për përfshirjen e të gjithë anëtarëve, përfshirë edhe kritikët e tij.
Ai ka theksuar se prioriteti i partisë tani është rindërtimi i strukturave dhe ringritja e saj pas rezultatit të dobët në zgjedhjet e fundit.
“Rruga përpara e LDK-së e një emër – rimëkëmbje. Kjo s’bëhet me natyrën e fituesit apo humbësit, por me përafrimin e të gjithë anëtarësisë. U bëj thirrje të gjithëve, edhe të kënaqurve me mua por edhe ata sidomos që nuk ishin të kënaqur me mua të vijnë të rreshtohen prapa qëllimit të përbashkët të anëtarësisë”, ka deklaruar Abdixhiku në një konferencë për media pas Kuvendit.
Gjatë mbledhjes së Kuvendit, sipas tij, janë miratuar dy dokumente kryesore: një që përcakton qëndrimin e LDK-së për zhvillimet politike në vend dhe një tjetër që synon riorganizimin e brendshëm të partisë.
Abdixhiku ka bërë të qartë se gjatë diskutimeve nuk janë trajtuar çështje konkrete për koalicione apo pozicione të veçanta, por janë vendosur vlera udhërrëfyese për të garantuar stabilitet dhe funksionim efikas të partisë.
Ai ka përfunduar duke nënvizuar rëndësinë e angazhimit të të gjithëve për të ndërtuar një strukturë të fortë, të aftë për të përballuar sfidat politike dhe për të përmirësuar performancën e LDK-së në të ardhmen. /teve1.info/
