Deputetja e zgjedhur nga Lidhja Demokratike e Kosovës, Janina Ymeri ka thënë se kërkesat për rritje të tarifave të energjisë elektrike mund të aprovohen.
Ajo ka thënë se kërkesa nga KESCO është bërë për shkak të importit të lartë.
E për këtë ajo ka thënë se fajtore është Qeveria, që sipas saj të gjitha politikat e energjisë janë bërë në favor të importit.
Ymeri në emisionin “InfoNata” ka akuzuar edhe kryeministrin në detyrë, Albin Kurti, të cilin e ka quajtur “kukull të mafias energjetike”.
“Nuk është e arsyeshme, po bëhet me zhvat gjepin tonë në përkrahje të tregëtarve të energjisë elektrike. Kemi një kryeministër që është kukull e mfisë energjetike, si e tillë gjitha politikat që bëhen në vend në sektorin e energjisë elektike janë në përkrahje të importit dhe jo të qytetarëve”, ka thënë ajo në emisionin “InfoNata” në Tëvë1.
Ajo ka thënë se LDK do të kundërshtojë një rritje të tillë, por jo edhe me protesta.
“Nuk besoj që veprimi i LDK –së ka me shkua në këtë drejtim me organizuar protesta, nuk është fryma jonë institucionale, mirëpo kemi me shfrytëzuar të gjitha format tjera parlamentare dhe institucionale për me kundërshtua rritjen e energjisë elektrike. Duhet me shkarkua bordin e ZRrE-së dhe drejtorin e saj”, ka thënë ajo.
Zyrtarë të ZRRE-së kanë thënë se kërkesat e operatorëve për shtrenjtim të tarifave do t’iu nënshtrohen shqyrtimit dhe se do të aprovohen vetëm kostot që vlerësohen si të arsyeshme.
Tre operatorët energjetikë në Kosovë kanë kërkuar rritjen e tarifave të energjisë elektrike për vitin 2026.
Rritja e çmimit të rrymës është kërkuar nga Operatori për Furnizim me Energji Elektrike (KESCO), Operatori i Sistemit, Transmisionit dhe Tregut (KOSTT) dhe Kompania për Distribuim të Energjisë Elektrike në Kosovë (KEDS), që kanë dërguar këto kërkesa në Zyrën e Rregullatorit për Energji në Kosovë (ZRRE).
