Princi i Kurorës Saudite, Mohammed bin Salman tha se Mbretëria nuk do të lejojë që hapësira ajrore ose territori i saj të përdoret për ndonjë veprim ushtarak kundër Iranit, gjatë një telefonate me Presidentin iranian Masoud Pezeshkian, sipas Agjencisë Saudite të Shtypit.
Bin Salman riafirmoi “qëndrimin e Mbretërisë për respektimin e sovranitetit të Republikës Islamike të Iranit”, duke theksuar se Arabia Saudite “nuk do të lejojë përdorimin e hapësirës ajrore ose territorit të saj në asnjë veprim ushtarak kundër Republikës Islamike të Iranit ose ndonjë sulm nga ndonjë palë, pavarësisht nga destinacioni i tyre”.
Ai gjithashtu përsëriti mbështetjen për “çdo përpjekje që synon zgjidhjen e mosmarrëveshjeve përmes dialogut në një mënyrë që rrit sigurinë dhe stabilitetin në rajon”.
Pezeshkian falënderoi vendet islamike për mbështetjen e tyre mes frikës së një sulmi të mundshëm amerikan, duke thënë se politika e Iranit bazohet në unitet dhe solidaritet, transmeton Anadolu.
“Unë besoj me gjithë zemër se umeti islamik dhe vendet islamike janë vëllezër dhe besoj fuqimisht se së bashku dhe përmes bashkëpunimit të përbashkët mund të ndërtojmë një rajon të sigurt, të zhvilluar dhe të begatë për popujt tanë”, tha ai.
Ai akuzoi Shtetet e Bashkuara dhe Izraelin për armiqësi, presion ekonomik dhe përpjekje për të provokuar trazira, duke thënë: “Ata menduan se me këto veprime, mund ta shndërronin Iranin në Siri ose Libi”, por shtoi se “prania e kombit iranian” i kishte penguar plane të tilla.
Pezeshkian tha se Irani kishte ndjekur dialogun, duke vënë në dukje: “Ne ishim në dialog me amerikanët kur, para syve të të gjithë botës, ata nisën një sulm ushtarak kundër nesh”, dhe theksoi se Irani mbetet i gatshëm “të mirëpresë çdo proces që çon në paqe, qetësi dhe shmangien e konfliktit dhe luftës”.
SHBA-ja thotë se të gjitha opsionet mbeten në tryezë në lidhje me Iranin, ndërsa zyrtarët iranianë paralajmërojnë se çdo sulm i SHBA-së do të shkaktonte një përgjigje “të shpejtë dhe gjithëpërfshirëse”.
