Të martën, Prokuroria Themelore e Prishtinës cak i patën tre zyrtarë të komunës së Prishtinës.
Më saktësisht, Departamenti i Krimeve Ekonomike zhvilloi një aksion hetimor nën dyshimin për veprat penale “Keqpërdorim i pozitës apo autoritetet zyrtar” dhe “Marrje e ryshfetit”.
Si shkak i saj arrestuan të tre punonjësit e komunës.
Njëri nga ta me inicialet A.G, madje u arrestua në flagrancë.
“Gjatë zbatimit të masave të veçanta hetimore, janë shoqëruar tre persona, ndër të cilët zyrtari i komunës, A.G., është arrestuar në flagrancë për veprën penale ‘’Marrje e ryshfetit’’ sipas nenit 421 të KPRK-së, me qëllim qe të ndihmojë të dëmtuarin të realizoj një pagesë për punët të cilat i kishte kryer sipas kontratës me komunën”, thuhet në njoftimin e Prokurorisë Themelore në Prishtinë.
E ndaj tyre është caktuar edhe masa e paraburgimit për 48 orë.
“Janë sekuestruar edhe telefona si prove e cila di të shërbejnë në zhvillimin e mëtejshëm të procedurës hetimore. Prokurori i shtetit brenda afatit ligjor do të parashtroje kërkesë me shkrim gjykatës kompetente për caktimin e ndonjë prej masave ndaj te dyshuarve”, ka thënë Shala.
Për këtë aksion ka folur edhe i pari i kryeqytetit, Përparim Rama.
Rama tha se janë të gatshëm për bashkëpunim dhe askush nuk është mbi ligjin.
“Në lidhje me arrestimin e zyrtarëve të Komunës së Prishtinës, Kryeqyteti do të ofrojë bashkëpunim të plotë me të gjitha organet kompetente, në përputhje me detyrimet ligjore dhe standardet e një shteti demokratik. Në këtë frymë, Kryeqyteti Prishtina mbetet i hapur për çdo proces verifikimi dhe veprim procedural, në frymë bashkëpunimi dhe me respekt të plotë për organet e drejtësisë të Republikës së Kosovës”, ka njoftuar Rama.
Por Lëvizja Vetëvendosje që janë opozitë në Prishtinë thonë se kjo është rezultat i qeverisjes së papërgjegjshme.
“Krimi dhe korrupsioni në Komunën e Prishtinës janë të rrënjosura thellë, si pasojë e një qeverisjeje të papërgjegjshme dhe pa llogaridhënie. Kjo gjendje ka dëmtuar seriozisht funksionimin e institucionit komunal, ka minuar besimin e qytetarëve dhe ka penguar zhvillimin normal të kryeqytetit”, kanë thënë nga LVV-ja në qendër të Prishtinës.
Prokuroria Themelore e Prishtinës ka bërë thirrje që të gjithë qytetarët të raportojnë rastet e natyrës së korrupsionit.
