Pas përfundimit të aksionit të zhvilluar sot në Prizren, i cili kishte të bënte me manipulime të votave dhe që çoi në arrestimin e 109 personave, Prokuroria Themelore ka bërë të ditur se janë zbuluar edhe raste që lidhen me veprën penale të “dhënies dhe marrjes së ryshfetit”.
Kryeprokurori i Prokurorisë Themelore në Prizren, Petrit Kryeziu, e konfirmoi këtë gjatë një konference për media, duke theksuar se hetimet janë zgjeruar edhe në këtë drejtim.
Sipas tij, rastet e ryshfetit janë zbuluar falë bashkëpunimit të njërit prej komisionerëve, i cili ka vendosur të bashkëpunojë me Prokurorinë.
Kryeziu shtoi se personat e dyshuar për këtë vepër penale mund të marrin edhe statusin e dëshmitarit bashkëpunues.
“Pjesa me dhënie e marrje të ryshfetit është zbuluar sot prej një prej komisionerëve ka vendosur të bashkëpunojë me Prokurorinë. Ata që janë të dyshuar, mund të marrin dhe cilësinë e dëshmitarëve bashkëpunëtorë”, tha Kryeziu.
