Shërbimi Korrektues i Kosovës (SHKK) ka reaguar ndaj raportimeve të fundit në disa media që pretendojnë mungesë kapacitetesh në institucionet korrektuese, duke i cilësuar ato si të pasakta dhe të pabazuara.
Në një njoftim zyrtar për opinionin publik, SHKK ka bërë të ditur se aktualisht në institucionet korrektuese të Kosovës janë në mbajtje gjithsej 1 mijë e 758 të burgosur, ndërsa kapacitetet ekzistuese lejojnë edhe rreth 800 shtretër të lirë.
Sipas këtij institucioni, këto të dhëna dëshmojnë qartë se nuk ka mungesë hapësirash për pranimin e rasteve të reja dhe se institucionet korrektuese funksionojnë brenda kapaciteteve të tyre.
“Shërbimi Korrektues i Kosovës ka kapacitete të lira rreth 800 shtretër, prandaj pretendimet për mungesë kapacitetesh nuk qëndrojnë. Institucionet korrektuese kanë hapësira të mjaftueshme për pranimin e rasteve të reja”, thuhet në reagim.
Po ashtu, SHKK ka theksuar se ky sqarim bëhet me qëllim të informimit të saktë të opinionit publik dhe parandalimit të keqinformimit.
Në fund të njoftimit, është përmendur edhe marrëveshja e mirëkuptimit ndërmjet Shërbimit Korrektues të Kosovës dhe Policisë së Republikës së Kosovës, e cila parasheh bashkëveprim institucional dhe mundësinë e shfrytëzimit të përkohshëm të objekteve të njëra-tjetrës, varësisht nga situatat e krijuara.
