Gjykata Themelore e Gjilanit i ka caktuar masën e paraburgimit prej një muaji Arianit Sllamnikut, bëhet e ditur në komunikatën zyrtare të gjykatës.
Sipas njoftimit, Sllamniku dyshohet për kryerjen e veprave penale “Ushtrim i kundërligjshëm i veprimtarisë mjekësore ose farmaceutike”, nga neni 256 i Kodit Penal të Republikës së Kosovës (KPRK), si dhe “Eksperimente të kundërligjshme mjekësore dhe testime të barnave”, nga neni 257 i të njëjtit kod.
Policia e Kosovës ka ndërmarrë veprime fillestare hetimore ndaj të dyshuarit, nën dyshimin se ai ka ushtruar veprimtari mjekësore pa kualifikim profesional, licencë dhe autorizim ligjor.
Në njoftimin e gjykatës thuhet se, nga një periudhë e papërcaktuar kohore e deri më 20 janar 2026, në rrugën “17 Shkurti” në Gjilan, në lokalin e regjistruar si “Consulence”, i pandehuri dyshohet se ka kryer trajtime dhe vizita mjekësore, duke u paraqitur kinse për trajtimin e Autizmit.
“I pandehuri, pa kualifikim profesional dhe pa autorizime ligjore, ka përshkruar dhe rekomanduar terapi të pa verifikuara dhe të pa konfirmuara, duke ushtruar veprimtari mjekësore në kundërshtim me ligjin”, thuhet në njoftimin e gjykatës.
Gjykata bën të ditur se gjatë zbatimit të urdhrit të kontrollit UGJK nr. 5/2026 nga Njësia për Hetime të Përgjithshme në Gjilan, në lokalin “Consulence” është gjetur edhe një dëshmitar, i cili kishte shkuar për konsultë lidhur me trajtimin e Autizmit. Po ashtu, janë gjetur dhe sekuestruar medikamente të ndryshme mjekësore.
Sipas gjykatës, i dyshuari ka kryer edhe veprën penale të eksperimenteve të kundërligjshme mjekësore, përmes komunikimit elektronik dhe telefonik, duke rekomanduar terapi farmaceutike të pa verifikuara.
“I pandehuri ka rekomanduar terapi të pa testuara, kryesisht për fëmijë të prekur nga spektri Autik, duke pretenduar largimin e metaleve dhe shërimin e Autizmit, në këmbim të pagesave të ndryshme”, thuhet më tej në komunikatë.
Gjykatësja e procedurës paraprake ka vlerësuar se ekzistojnë arsyet ligjore për caktimin e paraburgimit, duke theksuar se masat alternative do të ishin të pamjaftueshme për zhvillimin e suksesshëm të procedurës penale.
Palët kanë të drejtë ankese ndaj këtij vendimi në Gjykatën e Apelit të Kosovës.
