Tymi vazhdonte edhe pas më shumë se 15 orëve.
Kjo shtëpi në fshatin Goriq të komunës së Malishevës u përfshi nga flakët mbrëmjen e së martës.
E brenda saj, jetonin vetëm babë e bijë.
Nga zjarri, babai 82 vjeçar shpëtoi, por e bija mbeti brenda ku edhe ndërroi jetë.
Tëvë1 mëson se 54 vjecarja ishte e palëvizshme dhe familjarët nuk arritën ta shpëtonin nga flakët.
Këta të fundit, të mërkurën u panë në gjendje të rëndë.
Kur flakët kapluan shtëpinë, 82 vjecari tentoi të nxirrte jashtë edhe të bijën, por nuk ia doli.
Si pasojë e kësaj, edhe vet mori plagë të djegies.
Por nga Urgjenca e Komunës së Malishevës nuk dhanë detaje shtesë për plagët e babait.
Pak minuta pasi shtëpia u përfshi nga flakët, në vendngjarje arritën ekipet e zjarrfikësve.
Por, edhe këta të fundit thonë se e kishin të pamundur ta shpëtonin 54 vjeçarën.
“Vajza ka qenë e palëvizshme. Baba i viktimës ishte munduar me tërheq , por nuk ka mundur dhe kishte marrë edhe do djegie të lehta. Kur kemi shkuar viktima ka qenë e vdekur. Prokurori ka thënë se deri ai të vijë në vend ngjarje kufoma nuk bënë mu prek. Ne kemi vazhduar punën tonë kemi shuar zjarrin”, tha ai.
Bashkë me ta, në vend ngjarje dolën edhe zyrtarë të Policisë së Kosovës.
Komandanti i stacionit policor në këtë komunë, Nazmi Zogaj thotë se janë duke u kryer hetimet për shkakun e zjarrit.
Televizioni ka provuar të marrë një qëndrim edhe nga KEDS-i, por të njëjtit nuk kanë kthyer përgjigje deri në momentin e publikimit të kronikës.
