Një person i dyshuar për disa raste vjedhjeje, të raportuara gjatë vitit 2025, është arrestuar të martën nga Policia e Kosovës.
Sipas njoftimit zyrtar, i dyshuari dyshohet se nga kamionë të parkuar ka vjedhur portofole që përmbanin shuma të ndryshme parash.
“Sot nga hetuesit policorë të Stacionit Policor në Lipjan është arrestuar një person i dyshuar për vjedhje të raportuara gjatë vitit 2025, ku nga automjete të parkuara (kamionë), dyshohet se janë vjedhur portofole me shuma të ndryshme të parave”, thuhet në njoftimin e PK-së.
I arrestuari është identifikuar me inicialet S.H., 69 vjeç, shtetas i Maqedonisë së Veriut.
Ai është dërguar në mbajtje për së paku tri raste vjedhjeje të ndodhura në Lipjan, ndërsa Policia bën të ditur se ekziston dyshimi se i njëjti ka kryer vepra të ngjashme edhe në rajone të tjera të Kosovës.
“Bazuar në informacionet e deritanishme, i dyshuari dyshohet se ka kryer vepra penale të natyrës së njëjtë edhe në rajone të tjera të Kosovës, për të cilat po ndërmerren veprime të mëtejshme policore”, thuhet më tej në njoftim.
