Maroku dhe Senegali do të përballen sonte në finalen e madhe të Kupës së Kombeve të Afrikës, në një përballje që pritet të dhurojë spektakël.
Finalja do të zhvillohet në Rabat, ndërsa vë përballë dy kombëtaret që kanë treguar formë të mirë gjithë turneut duke mos regjistruar asnjë humbje deri në finale.
Maroku, si organizator i këtij edicioni të Kupës së Afrikës, e mbylli fazën e grupeve me shtatë pikë dhe më pas eliminoi Tanzaninë, Kamerunin dhe Nigerinë në fazën eliminatore, duke konfirmuar ambiciet për trofeun.
Edhe Senegali pati një rrugëtim të ngjashëm, duke grumbulluar shtatë pikë në fazën e grupeve, përpara se të linte pas Sudanin, Malin dhe Egjiptin në fazat vendimtare.
Edhe pse të dyja ekipet janë të njohura për lojën ofensive dhe së bashku kanë shënuar 21 gola në turne, pritet që finalja në stadiumin “Prince Moulay Abdallah” të zhvillohet me kujdes të shtuar nga të dyja palët.
Maroku mbështetet kryesisht te dyshja sulmuese Brahim Diaz dhe Ayoub El Kaabi, ku Diaz është golashënuesi më i mirë i turneut me pesë gola, ndërsa El Kaabi ka realizuar tre.
Nga ana tjetër, Senegali ka shpërndarë në mënyrë më të balancuar golat e tij, ku prej 12 golave të shënuar, Sadio Mane ka realizuar tre, ndërsa Nicolas Jackson, Pape Gueye dhe Cherif Ndiaye kanë kontribuar me nga dy gola secili.
Të dyja kombëtaret synojnë titullin e tyre të dytë në Kupën e Kombeve të Afrikës. Maroku do ta fitonte trofeun pas një pritjeje prej 50 vitesh, ndërsa Senegali ishte kampion i kontinentit në vitin 2021.
Finalja mes Marokut dhe Senegalit do të luhet sonte në Rabat, me fillim nga ora 20:00.
