Akademia e “Flakës së Janarit”, e cila këtë vit i është kushtuar përkujtimit të masakrës së Reçakut, është mbajtur sot në Gjilan, me pjesëmarrjen e përfaqësuesve institucionalë, familjarëve të viktimave dhe qytetarëve.
Në këtë ngjarje ishte planifikuar të merrte pjesë edhe ish-shefi i Misionit Verifikues të OSBE-së në Kosovë, ambasadori William Walker, i njohur për rolin e tij kyç në dokumentimin dhe denoncimin e krimeve të kryera nga forcat serbe në Reçak në vitin 1999. Megjithatë, ai nuk arriti të marrë pjesë në akademi për shkak të një problemi shëndetësor të bashkëshortes së tij.
Kryeministri në detyrë, Albin Kurti, gjatë fjalës së tij, vlerësoi kontributin e ambasadorit Walker, duke theksuar se denoncimi i masakrës së Reçakut nga ana e tij ishte vendimtar për sensibilizimin e opinionit ndërkombëtar dhe për zbardhjen e së vërtetës mbi këtë krim kundër njerëzimit.
Kurti njoftoi se bashkëshortja e ambasadorit Walker po trajtohet në emergjencën e komunës së Vitisë, duke bërë të ditur se gjendja e saj shëndetësore e ka pamundësuar ardhjen e tij në Gjilan.
“Me këtë rast, i bashkohemi urimeve për shëndetin e bashkëshortes së ambasadorit Walker, e cila për shkak të një problemi serioz shëndetësor po trajtohet në emergjencë në komunën e Vitisë, dhe shpresojmë në një rikuperim të shpejtë dhe të plotë”, ka deklaruar Kurti.
