Policia e Kosovës ka arrestuar rreth orës 01:30 të datës 11.04.2024 të dyshuarin A.G., në kuadër të rastit penal “Fajdeja”, pas një pune operative dhe hetimore nga Drejtoria për Hetimin e Krimeve të Rënda dhe Krimit të Organizuar.
Rasti për veprën penale “Fajde” ishte iniciuar më 18.10.2022, ndërsa kallëzimi penal ishte dorëzuar në Prokurorinë Themelore në Ferizaj më 20.10.2022, me raporte plotësuese edhe gjatë vitit 2023, ku si i dyshuar përfshihej edhe A.G.
Me urdhëresë të Gjykatës Themelore në Ferizaj, më 17.05.2023 ishte kryer kontroll në shtëpinë e tij në Vushtrri, por i njëjti nuk ishte hasur dhe ishte shpallur në kërkim policor, deri në arrestimin e tij ditën e djeshme.
Sipas Policisë, në rastin “Fajdeja” janë të përfshirë gjithsej 36 persona të dyshuar, prej të cilëve 28 janë arrestuar deri më tani, ndërsa disa të tjerë mbeten ende në kërkim policor. Hetimet po vazhdojnë nën autorizimin e Prokurorisë Themelore në Ferizaj, me masa të avancuara hetimore.
Policia e Kosovës ka theksuar se mbetet e përkushtuar në luftimin e krimeve të rënda dhe korrupsionit, si dhe në zbardhjen e plotë të të gjitha veprave penale në vend.
