Michael Carrick është shfaqur si favoriti kryesor për t’u emëruar trajner i përkohshëm i Manchester United, sipas burimeve pranë procesit.
Drejtuesit e klubit shpresojnë të zhvillojnë një takim vendimtar sapo lojtarët të kthehen në stërvitje të mërkurën, ndërsa bisedimet me 44-vjeçarin thuhet se kanë përparuar ndjeshëm, edhe pse ende nuk ka një vendim përfundimtar.
United ndodhet në një periudhë të trazuar pas shkarkimit të Ruben Amorim më 5 janar, vetëm 14 muaj pasi kishte marrë drejtimin e skuadrës.
Fillimisht, përgjegjësia e përkohshme iu besua Darren Fletcherit, por rezultatet nuk bindën, me humbjen ndaj Brightonit në Kupën FA dhe barazimin kundër Burnleyt në Premier League, duke bërë që kjo periudhë e shkurtër të mbyllet pa vazhdimësi.
Carrick nuk është i panjohur për këtë rol.
Në vitin 2021, pas shkarkimit të Ole Gunnar Solskjaer, ai drejtoi United për tre ndeshje si trajner i përkohshëm, duke regjistruar dy fitore dhe një barazim. Megjithatë, ai u largua sapo Ralf Rangnick u emërua në atë kohë, pavarësisht rezultateve pozitive.
Ish-mesfushori i Anglisë ka qenë pa punë që nga qershori i kaluar, kur u shkarkua nga Middlesbrough pas dy vitesh e gjysmë në krye.
Ai e udhëhoqi Boron drejt play-off-eve të Championship në sezonin 2022-23, por humbja në gjysmëfinale ndaj Coventryt dhe dështimi për të hyrë në top-6 në sezonet pasuese i kushtuan vendin e punës.
Edhe pse Carrick nuk ka të njëjtën përvojë menaxheriale si Solskjaer, ai mbetet një figurë e respektuar në Old Trafford.
Me 464 ndeshje të luajtura për United dhe me përvojë të gjatë në stafin teknik, përfshirë periudhën nën drejtimin e Jose Mourinhos dhe më pas Solskjaer, drejtuesit e klubit e shohin atë si një zgjedhje që mund të sjellë stabilitet të menjëhershëm në një moment delikat për skuadrën.
