Me 404 mijë e 23 vota, Albin Kurti është njeriu më i votuar në historikun zgjedhor të Kosovës.
Përfundimi i numërimit të votave ka konfirmuar përfundimisht top pesëshet e secilës prej partive politike.
Në Vetëvendosje pas Kurtit, renditet Glauk Konjufca, i cili me 317 mijë e 532 vota, ka thyer gjithashtu një rekord, duke u bërë njeriu i dytë më i votuar ndonjëherë në Kosovë.
Pas Konjufcës vijnë Albulena Haxhiu, Hekuran Murati dhe Donika Gërvalla Schwarz, që e përmbyllë top pesëshen e koalicionit fitues së zgjedhjeve të 28 dhjetorit.
Në Partinë Demokratike të Kosovës, me 161 mijë e 931 vota, i pari është lideri Bedri Hamza.
Në pesëshen e parë të PDK-së ka disa befasi.
Përkundër që garës i hyri me numrin 30-të, Arian Tahiri renditet i dyti për nga votat në PDK, me gjithsej 71 mijë e 699.
Pas tij është gjithashtu një figurë e re në PDK, profesori Përparim Gruda, i cili mori gjithsej 66 mijë e 110 vota.
Pesëshen e parë e përmbyllin Uran Ismaili dhe Sala Jashari.
E në Lidhjen Demokratike të Kosovës, që në zgjedhje mori diçka më shumë se 13%, nuk ka shumë befasi.
I pari renditet kryetari Lumir Abdixhiku me 88 mijë e 445 vota. Pas tij vjen Hykmete Bajrami me 57 mijë e 153 vota, kurse pjesë e top-treshës është Ukë Rugova me 49 mijë e 605 vota.
Pas djalit të Presidentit historik Ibrahim Rugova, renditen ish-kryeministri Avdullah Hoti, dhe deputetja e disa mandateve, Doarsa Kica Xhelili.
Në AAK një figurë e re në pesëshen e parë është Besnik Tahiri, që me 26 mijë e 423 vota i rikthehet Kuvendit.
Në vendin e parë renditet ish-kryeministri Ramush Haradinaj me 43 mijë e 997 vota, ndërkaq pas tij vijnë Daut Haradinaj e Bekë Berisha.
Gjenerali Agim Çeku përkundër që u rendit i pesti, nuk do të arrij që të hyj në Kuvend, pasi për shka ktë kuotës gjinore, pjesë e legjislaturës së re do të jetë Time Kadrijaj me 16 mijë e 927 vota.
Ulëset e Kuvendit do të ndahen në këtë mënyrë.
57 i takojnë Lëvizjes Vetëvendosje, 22 PDK-së, 15 LDK-së dhe gjashtë AAK-së.
Nga 20 ulëset e rezervuara për minoritetet, 9 nga to do t’i zë Lista Serbe.
Pjesë e Kuvendit do të jetë edhe ministri në detyrë, Nenad Rashiq.
Zëdhënësi i KQZ-së, Valmir Elezi, ka thënë se janë të gatshëm që sot t’i shpallin rezultatet përfundimtare, mirëpo u duhet të presin afatet ligjore për shqyrtimin e ankesave të mundshme në PZAP dhe në Gjykatën Supreme.
