Nga reshjet e shiut, i gjithë oborri i një qytetari në Mitrovicë të Jugut është vërshuar.
Dëmet të cilat i ka pësuar, Ardian Latifi thotë se janë të mëdha.
“Dëmet janë të mëdha, është hi në çdo shtëpi këtu që e kena. Katin e parë deri në gjysë, për katin e parë krejt jonë prish. Jena mundu me pshtu sene sa më shumë, po masi veçse mbrenda ore u rrit uji tepër shumë, për shkak se e kanë lëshuar Ibrin ka ndodh shumë shpejt”.
Të njëjtin hall e ka edhe axha i tij, Mehmeti.
“Para dy vjetëve i njëjti rast, por sivjet edhe më shumë. Kati i parë thuajse mbi gjysë, me krejt çka ka, thuja mo janë të pavlefshme, me kuzhinë, kauça, me tesha, krejt. S’kemo mujt kurgjo me ndërmarr se brenda ore veç u mbush me shi. Dëmi është i jashtëzakonshëm. Çdo dy vjet qeshtu po na ndodh”
Latifi thotë se shkak i dëmeve që iu shkaktuan, ai u detyrua që gjumin ta bëjë në veturë.
Për të parandaluar dëmet, kryetari i komunës, Faton Peci thotë se kanë bërë disa intervenime.
“Falë disa intervenimeve, unë besoj se kemi kontribuar në pamundësimin e daljes nga shtrati të lumit Lushta, madje edhe në parandalimin e vështirësive dhe rreziqeve nga ky lum drejt rrjedhës së lumit Ibër. Rasti i fundit ishte ai i lumit Sitnica, i cili, bazuar në disa vlerësime, dhe duke marrë parasysh se edhe unë banoj në atë pjesë, konkretisht në lagjen ‘2 Korriku’, ka shkaktuar dëmet më të mëdha në Komunën e Mitrovicës. Vlerësohet se sasia e ujit e shkaktuar nga reshjet ka qenë në atë nivel si para 20 vitesh, diku rreth vitit 2006, që tani është përsëritur”.
Ndërsa sa i përket kompensimit për qytetarët, Peci thotë se do të koordinohen me nivelin qendror.
“Ne do të koordinohemi me institucionet e Qeverisë Qendrore dhe në bazë të një vendimi të Qeverisë Kurti 2, do të bëhen vlerësimet, por edhe kompensimet për dëmet e të gjitha natyrave, jo vetëm për familjet, por edhe për bizneset, bujqësinë dhe sektorë të tjerë. Kompensimet, kryesisht në nivel vendi, i bën Qeveria përmes vlerësimeve të AME-së, ndërsa ne si komunë do të kontribuojmë në procesin e vlerësimit të dëmeve. Po ashtu, si komunë, përkundër faktit që kapaciteti ynë buxhetor është tepër i vogël në raport me Qeverinë, do të marrim pjesë me kontributin tonë”.
Rreshjet që ranë ditët e fundit bënë që disa qytete në Kosovë të përballen me vërshime, si Klina, Malisheva, Gjakova, Deçani e Juniku.
Kronikë e realizuar nga gazetarja Adea Mustafaj.
