Vizita e kancelarit gjerman Olaf Scholz në Kosovë i ka shtuar shpresat e kosovarëve për liberalizimin e vizave.
Pritjet në Prishtinë janë që në samitin e BE-së, që do të zhvillohet më 23 dhe 24 qershor në Bruksel, Kosova të futet në agjendë në mënyrë që vendimi të merret në nivelin e lartë politik të Këshillit të BE-së.
E Violeta Haxholli, nga Instituti Demokratik i Kosovës, thotë se në këtë momentum, Kosova duhet t’i shfrytëzoj edhe këto pak ditë për lobim të vendet skeptike.
“Së pari është pozitive që sërish ekziston një far sinjali pozitiv nga ana e Bashkimit Evropian, për mundësinë që Kosovës t’i ofrohet liberalizimi i vizave, pas një kohet të gjatë që kur kjo temë as nuk është diskutuar brenda Bashkimit Evropian … Çfarë duhet që të bëjë Kosova në këtë moment është që, meqenëse se ka një sinjal pozitiv nga zyrtarët e Bashkimit Evropian, është që të punojë me shtetet skeptike të cilat herën e fundit pra nuk kanë qenë dakord që Kosovës t’i ofrohet liberalizimi i vizave, pra duhet të ketë një lobim më aktiv nga ana e Kosovës tek këto shtete”, tha ajo.
Ndërsa, njohësja e çështjeve politike, Shqipe Pantina, thotë se BE-ja po kërkon nga qeveria e Kosovës, disa parakushte, për të marrë liberalizimin e vizave.
“Nga disa informacione që kanë qarkulluar, jozyrtare natyrisht, thuhet se janë tri parakushte që Qeveria jonë të paktën duhet të zotohet se do t’i plotësojë në mënyrë që përfundimisht të hiqen vizat dhe ato janë zbatimi i vendimit të Gjykatës Kushtetuese për Manastirin e Deçanit, zotimi se do të fillojë hartimi i statutit për Asociacionin e Komunave me Shumicë Serbe, si dhe zotimi dhe dhënia shenjë e pjesëmarrjes në procesin negociator me Serbinë”, tha Pantina.
Në një intervistë për EuronewsAlbania, emisari Miroslav Lajcak, ka thënë se vizat për Kosovën do të hiqen, por që ka refuzuar të jap ndonjë datë.
