Gjykata Kushtetuese ka shpallur antikushtetuese 13 ligje të miratuara nga Kuvendi, nga shumica parlamentare e Qeverisë Kurti gjatë legjislaturës së kaluar. Ndër 15 ligjet për të cilat PDK-ja kishte paraqitur ankim në Gjykatën Kushtetuese, vetëm 3 janë lënë në fuqi, duke kaluar kështu testin e kushtetutshmërisë.
Sipas aktgjykimit të shpallur sot, me 5 vota për dhe dy kundër, Gjykata ka konstatuar se 13 vendime të Kuvendit, përmes të cilave ishin miratuar ligje nga Qeveria Kurti, nuk përputhen me nenet 4, 7, 74, 76 dhe 77 të Kushtetutës së Kosovës.
Ndërkaq, 3 ligjet e tjera – për Bankat, Inspektoratin Qendror të Mbikëqyrjes së Tregut dhe Gjykatën Administrative janë vlerësuar si kushtetuese.
Ligjet e shfuqizuara janë: Ligji për Shërbimet e Pagesave; Ligji kundër dukurive negative në sport; Ligji për ndryshimin dhe plotësimin e Ligjit për parandalimin e pastrimit të parave dhe luftimin e financimit të terrorizmit; Ligji për provimin e maturës shtetërore; Ligji për Banim Social dhe të Përballueshëm; Ligji për Kontabilitet, Raportim Financiar dhe Auditim; Ligji për Sigurimin e Detyrueshëm të Kujdesit Shëndetësor; Ligji për ndryshimin dhe plotësimin e Ligjit për Prokurorinë Speciale; Ligji për Inspektoratin Qendror të Trashëgimisë Kulturore; Ligji për Financimin e Menaxhimit të Resurseve Ujore; Ligji për Inspektoratin Qendror të mjedisit, ujërave, natyrës, ndërtimit si dhe mbrojtjen nga rrezatimi dhe siguria bërthamore; si dhe Ligji për Lojërat Mesdhetare.
Sipas vendimit të Kushtetueses, gjatë miratimit të këtyre 123ligjeve, të gjitha të hartuara nga Qeveria Kurti në përputhje me programin dhe zotimet e saj politike, Kuvendi ka shkelur nenet kushtetuese që rregullojnë formën e qeverisjes dhe ndarjen e pushtetit; përcaktojnë vlerat themelore të rendit kushtetues të Republikës së Kosovës; rregullojnë ushtrimin e funksionit të të zgjedhurve të popullit; funksionimin e Kuvendit sipas rregulloreve të punës; si dhe rolin e komisioneve parlamentare në Kuvend./teve1.info/
