Shtetet e Bashkuara të Amerikës kanë përsëritur mbështetjen e tyre për iniciativën rajonale “Ballkani i Hapur”.
Në Forumin e Prespës që po mbahet në Ohër të Maqedonisë së Veriut, i dërguari special i ShBA-së për Ballkanin Perëndimor, Gabriel Escobar tha se kjo iniciativë është e fokusuar në integrimin evropian.
“Ballkani i Hapur përderisa është i fokusuar në integrimin evropian, do të jetë i hapur për të gjitha vendet. Ajo nuk është e vetmja iniciativë që e përkrahim, ne i përkrahim të gjitha iniciativat tjera që na bashkojnë”, tha Escobar.
Teksa ministrja e Punëve të Jashtme, Donika Gërvalla tha se pavarësisht vështirësive Kosova po mundohet të afrohet me NATO-n.
“Kjo nuk është e lehtë, por ne duhet të luftojmë dhe jemi më afër njëri-tjetrit, pasi Kosova dhe NATO janë të ndërlidhura me njëra-tjetrën, pasi që NATO është pjesë e historisë së Kosovës dhe është prezente në Kosovë”, tha ajo.
Në ditën e dytë të forumit, presidentja Vjosa Osmani zhvilloi takime të ndara me të dërguarin amerikan Escobar dhe atë gjerman për Ballkanin Perëndimor, Manuel Sarrazin. Siç bëhet e ditur në një komunikatë, atyre presidentja ua nënvizoi rëndësinë e integrimit të Kosovës në struktura euroatlantike.
“Integrimi i Kosovës dhe vendeve të tjera demokratike të rajonit në strukturat euro-atlantike është përgjigja e vetme për ta parandaluar agjendën destablizuese dhe ndikimin keqdashës të Rusisë dhe satelitëve të saj në rajonin tonë”, tha Osmani.
Po ashtu, presidentja zhvilloi një takim me kryediplomatin polak Zbigniew Rau, të cilit i kërkoi mbështetjen e Polonisë për anëtarësimin e Kosovës në Këshillin e Evropës dhe strukturat euro-atlantike.
Të pranishmëve në Forumin e Prespës të premten iu drejtua edhe ministrja e Ekonomisë, Artane Rizvanolli e cila tha se Kosova është plotësisht e përkushtuar ndaj themelimit të Tregut të Përbashkët Rajonal. Forumi i Prespës i përfundon punimet të shtunën.
Raporti i gazetarit Gojart Jashari.
