Procesi i numërimit të votave të ardhura me postë për zgjedhjet e parakohshme për Kuvendin e Kosovës 2025 po shkon drejt përmbylljes, ndërsa kanë mbetur edhe 25 kuti për t’u numëruar.
Sipas të dhënave të fundit të publikuara nga Komisioni Qendror i Zgjedhjeve (KQZ), deri më tani janë numëruar 120 nga gjithsej 145 kuti, që përbëjnë 82.76 për qind të votave të ardhura me postë.
Rezultatet aktuale tregojnë se LVV kryeson bindshëm me 73.18 për qind të votave, përkatësisht 25,828 vota.
Në vendin e dytë renditet LDK me 10.02 për qind apo 3,536 vota, ndërsa PDK ka siguruar 8.77 për qind, që përkthehet në 3,096 vota.
AAK ka marrë 3.91 për qind të votave të numëruara deri tani.
Nga KQZ është bërë e ditur se procesi i numërimit po vazhdon sipas planit dhe se rezultatet përfundimtare do të publikohen pas përfundimit të plotë të numërimit dhe verifikimeve përkatëse.
