Kupa e Kosovës në basketboll nis sot me dy ndeshje tejet interesante që i përkasin fazës çerekfinale.
Sonte zhvillohet një nga përballjet më të pritura të çerekfinaleve të Kupës së Kosovës në basketboll, ku Trepça dhe Golden Eagle Ylli do të maten mes vete në palestrën “Minatori” në Mitrovicë.
Ndeshja, e cila konsiderohet derbi i kësaj faze të garës, nis nga ora 18:45 dhe pritet të sjellë rivalitet të fortë në parket, duke pasur parasysh historinë e përballjeve mes dy skuadrave.
Të dy ekipet synojnë rezultat pozitiv në ndeshjen e parë, duke ditur se çerekfinalet luhen me sistemin vajtje-ardhje, çka e bën çdo pikë tejet të rëndësishme në luftën për një vend në gjysmëfinale.
Të dy trajnerët, si Adis Bećiragić ashtu edhe Jerenimo Sarin, pritet t’i kenë të kompletuara skuadrat, me të gjithë lojtarët në dispozicion.
Në ndeshjet kokë më kokë, Trepça ka dominuar këtë edicion, duke shënuar dy fitore në po aq ndeshje.
Ndeshja tjetër përball skuadrat Bora dhe Rahoveci, të cilat do të takohen në Prishtinë, saktësisht në palestrën “1 Tetori”.
Edhe ky takim nis nga ora 18:45 dhe paraqet ndeshjen e parë mes dy ekipeve në kuadër të kësaj faze, e cila zhvillohet me sistemin vajtje-ardhje.
Të dyja skuadrat synojnë të krijojnë epërsi që në përballjen e parë, për ta pasur më të lehtë ndeshjen e kthimit.
Në duelet ndërmjet vete, të dy skuadrat kanë mposhtur nga një herë njëra-tjetrën, çka e bën këtë takim edhe më interesant.
Pritet një duel tërheqës, me Borën që luan para publikut vendas, ndërsa Rahoveci vjen me synimin për të marrë një rezultat pozitiv nga kryeqyteti.
