Lajme të mira vijnë nga kampi i Grasshopper Club Zürich në prag të nisjes së pjesës së dytë të sezonit. Kapiteni Amir Abrashi është rikthyer në stërvitje me ekipin pas një pauze disa javore për shkak të dëmtimit muskulor.
Mesfushori shqiptar kishte munguar që nga mesi i muajit tetor dhe deri tani ka zhvilluar vetëm dy ndeshje në këtë edicion, duke qenë një mungesë e ndjeshme për “Hoppers”. Rikthimi i tij në stërvitje vjen në momentin e duhur, teksa GC po përgatitet për startin e fazës së dytë të Superligës zvicerane.
Klubi konfirmoi rikthimin e kapitenit përmes një postimi në rrjetet sociale, duke ndarë lajmin me tifozët dhe duke rritur optimizmin për vazhdimësinë e sezonit.
Grasshoppers do ta nisin pjesën e dytë të kampionatit më 18 janar, me një përballje të vështirë ndaj kryesuesve të tabelës, FC Thun. Megjithatë, prania e Amir Abrashit në ekip pritet të jetë një shtysë e madhe për skuadrën, si në aspektin sportiv, ashtu edhe në atë motivues.
