Edhe pse u prezantua para më shumë se një muaji, fundori Scott Bamforth të dielën ka nisur stërvitjet me skuadrën e Golden Eagle Yllit.
Ylli, ka publikuar videon e Bamforthit duke stërvitur dhe pret shumë prej amerikanit me pasaportë të Kosovës, duke u bazuar në përvojën e tij.
Bamforth ka luajtur për Kombëtaren e Kosovës dhe te Ylli do të paraqitet si basketbollist vendor, gjë që i jep përparësi edhe më shumë në parket ekipit nga Suhareka.
36-vjeçari do të jetë pjesë e Yllit deri në fund të këtij sezoni, ndërsa kjo është hera e parë e tij që do të paraqitet në Superligën e Kosovës në basketboll.
Bamforth ka përvojë jashtëzakonisht të madhe në Evropë, ndërsa Yllit i është bashkuar pas përvojës në Meksikë, ku u shpall kampion me ekipin Fureza Regia, si dhe MVP i serisë finale.
Gjatë karrierës evropiane, Bamforth ka luajtur në Spanjë për Sevillan, Murcian, Bilbaon, Rio Breogan e Granadan.
Në Itali ka bartur fanellën e Dinamo Sassari e Pesaro, pastaj Le Mansit në Francë e Buduqostit në Mal të Zi.
Me fanellën e Yllit, Bamforth pritet të debutojë në mesjavë kundër Trepçës, ndeshje kjo që luhet në Mitrovicë në kuadër të Kupës së Kosovës.
