Jetën e kishte plot e përplot sfida.
Por betejën më të madhe Behxhet Gashi e kaloi në moshën 21 vjeçare.
Mu në këto vite të rinisë, jeta e tij mori kahje tjetër si pasojë e një incidenti që pati në vendin e tij të punës.
“Në vitin 1980 kam qenë i punësuar në një fabrikë të Novi Sadit. Aty kam qenë punëtorë i thjeshtë kam pasur gypat për ujësjellës me i pastru, e ai pastrim është bërë me një lloj kiseline. Kisha nevojë se prindi më vdiq kur isha një muaj, jetova në kushte shumë të vështira. E i dhashë vetës fuqi që të fitojë atë punë e të mbesë përherë aty. Gjashtë muaj punova aty sa që edhe u zgjodha ndër punëtorët më të mirë. E menaxheri më tha të pyes familjen që të shkoj të punoj në Novi Sad. Por nuk arrita të shkoj atje, pasi në vend të punës i lëndova sytë me atë lloj kiseline edhe e humba të pamurit”, thotë Gashi për Tëvë1.
Pas pak kohësh, shikimi i tij veç se filloi të kthehej pas hospitalizimit në Beograd.
“Mbas dy ditë të operimit që ndodhi mi kanë pastruar sytë me pika. E kam vërejtur që si hije po e shof mjekun e po e dalloj ngjyrën e bardhë. Aty kam qëndruar plotë katër javë e pesë vit të tjera kam shkuar në kontroll çdo gjashtë muaj. E shqimin e afrova diku për 50 %, ai shikim që kisha më mjaftonte sa më punuar për më i ndihmuar familjes”, tregon ai.
Ndërsa, ishte pikërisht ky incident në punë që e shtyu Gashin, të bëhet pjesë e shoqatës së personave të verbër si dhe me shikim të dobët.
Një herë si vullnetar, e më pas nënkryetar i shoqatës, kurse sot gëzon postin e kryetarit të shoqatës që ka 650 anëtarë dhe tregon shqetësimet që kanë si shoqatë.
“Çfarë është brenga jonë është 50 me një për punësim e fatkeqësisht ën këto 25 vite ka qenë numër shumë i vogël. Mesazhi im ka qenë qysh në vitin 2003 që ne jemi të barabartë me gjithë personat e aftë, ne na mungon shikimi por asgjë tjetër nuk na mungon”, shprehet Gashi.
Gashi, i cili përveç Prishtinës, në përfaqësim ka edhe Komuna të tjera si ajo e: Fushë Kosovës, Obiliqit, Podujevës, Drenas dhe Lipjanin kërkojnë veprim të menjëhershëm nga institucionet.
“Punëtori çka unë urgjentisht kam nevojë është një administrator. Ju bëjë apel gjashtë Komunave tona që unë i përfaqësoj të kontribuojnë për pagesën e një administratori jo për një apo dy muaj, se administratori duhet me qenë punëtor i përhershëm këtu. Kurse nga donatorët, e nga Kuvendi Komunal dhe nga Qeveria të ndihmojnë për zbulimin e anëtarëve që është kusht i parë, e punëtori është pika e dytë të ndihmojnë për aktivitete”, thotë ai..
Por se a ka pasur progres apo regres në përgjithësi për të verbëritë në Kosovë?
“Vështirësi kemi pasur prej fillimit të vitit sepse në përgjithësi në Kosovë janë zvogëluar fondet për financimin e OJQ-ve. Kështu që ajo ka reflektuar edhe tek ne kemi pasur projekte shumë pak gjatë këtij viti. Por në aspektin e ligjit për personat e verbër kemi pasur një progres në këtë vit, ku për herë të parë Ministria e Shëndetësisë ka filluar me furnizimin me paisje për personat e verbër ndihmëse”, Daut Teshiku – kryetar i shoqatës së personave të verbër në Kosovë.
Nga kjo shoqatë thonë se presin që në vitin 2026 të reflektojnë edhe dikaster e tjerë ë të bëhet me shumë për këtë kategori të shoqërisë.
