Kryetari i Lidhjes Demokratike të Kosovës, Lumir Abdixhiku, ka bërë homazhe sot me rastin e 23-vjetorit të vrasjes së Kolonelit Tahir Zemaj, djalit të tij Enisit dhe Hasan Zemajt, kryetar i Forumit të Rinisë së LDK-së në Deçan.
Në homazhe morën pjesë edhe familjarë të familjes Zemaj si dhe bashkëpunëtorë të Abdixhikut.
Me këtë rast, Abdixhiku vlerësoi lart kontributin dhe sakrificën e Kolonel Tahir Zemajt për lirinë dhe pavarësinë e Kosovës, duke e cilësuar atë si një figurë të shquar të rezistencës dhe një strateg të luftës në Dukagjin.
“Në këtë përvjetor të dhimbshëm, kujtojmë me respekt të thellë dhe dhimbje të madhe tre burra që ia kushtuan jetën Kosovës dhe idealit të lirisë. Kolonel Tahir Zemaj ishte një patriot i rrallë, ushtarak vizionar dhe strateg i luftës, që me guxim e mençuri udhëhoqi beteja vendimtare të UÇK-së në Dukagjin kundër regjimit serb, duke lënë gjurmë të pashlyeshme në historinë e rezistencës sonë”, thuhet në njoftimin e partisë.
Ai kujtoi gjithashtu rrethanat tragjike të vrasjes së tyre, duke theksuar se kjo ngjarje vazhdon të rëndojë ndërgjegjen e shoqërisë kosovare.
“Ishte janari i acartë i vitit 2003, kur Kosova u trondit nga lajmi i kobshëm për ekzekutimin e Kolonelit Tahir Zemaj, të birit të tij Enisit dhe të kushëririt Hasan Zemaj, një krim që ende rëndon ndërgjegjen e shoqërisë sonë. Ata u vranë pabesisht, vetëm sepse besuan dhe punuan për një Kosovë të lirë, demokratike dhe me institucione të forta”.
Abdixhiku tha se figura e Kolonel Tahir Zemajt mbetet simbol i sakrificës dhe përkushtimit ndaj atdheut, duke përmendur edhe angazhimin e tij politik në LDK dhe bashkëpunimin me Presidentin historik, Ibrahim Rugova.
Ai shtoi se edhe pas 23 vjetësh, drejtësia për këtë krim ende mungon.
