Një javë pas mbajtjes së zgjedhjeve të parakohshme parlamentare, procesi i numërimit të votave ende nuk ka përfunduar, ndërsa rezultatet e deritanishme tregojnë një fitore të qartë të Lëvizjes Vetëvendosje (VV).
Sipas të dhënave aktuale, VV ka siguruar 50.16 për qind të votave. Në vendin e dytë renditet Partia Demokratike e Kosovës (PDK) me 20.66 për qind, e pasuar nga Lidhja Demokratike e Kosovës (LDK) me 13.42 për qind.
Aleanca për Ardhmërinë e Kosovës (AAK) ka arritur të sigurojë 5.6 për qind të votave, ndërsa Nisma Socialdemokrate, e udhëhequr nga Fatmir Limaj, ka mbetur jashtë Kuvendit, pasi nuk ka kaluar pragun zgjedhor.
Deri më tani janë numëruar votat e rregullta si dhe ato nga përfaqësitë diplomatike. Ndërkohë, ka nisur procesi i numërimit të votave me postë, pas të cilit pritet të numërohen edhe votat me kusht dhe votat e personave me aftësi të kufizuara.
Kandidatët më të votuar sipas partive
Sipas rezultateve të përditësuara nga Komisioni Qendror i Zgjedhjeve (KQZ), kandidatët më të votuar në secilën parti janë:
• VV: Albin Kurti, Glauk Konjufca, Albulena Haxhiu, Hekuran Murati, Donika Gërvalla
• PDK: Bedri Hamza, Arian Tahiri, Përparim Gruda, Uran Ismaili, Sala Jashari
• LDK: Lumir Abdixhiku, Hykmete Bajrami, Ukë Rugova, Avdullah Hoti, Doarsa Kica-Xhelili
• AAK: Ramush Haradinaj, Daut Haradinaj, Besnik Tahiri, Bekë Berisha, Agim Çeku
Procesi i numërimit vazhdon, ndërsa KQZ pritet të publikojë përditësime të tjera deri në shpalljen e rezultateve përfundimtare.
