Autoritetet zvicerane po vazhdojnë aksionin e kërkimit për viktimat e zjarrit në një bar në një resort skijimi në Crans-Montana të Zvicrës, nga nata e Vitit të Ri.
Rreth 40 persona kanë humbur jetën e 115 janë lënduar.
Ekipet emergjente vazhdojnë të qëndrojnë ende në vendngjarje, shkruan BBC.
Sipas doktorëve, ka të lënduar rëndë, me djegie deri të shkallës së tretë.
Ndërkaq autoritetet kanë bërë të ditur se do të duhen edhe disa ditë ose madje javë për t’i identifikuar viktimat.
Mathias Reynard, presidenti i Kantonit Valais, i tha radios zvicerane këtë mëngjes se staf shtesë kishte ardhur në ditën e tyre të pushimit për të ndihmuar dhe se po zhvilloheshin diskutime për të sjellë specialistë shtesë të djegieve nga Franca.
Ndërkohë, pritja e mundimshme për të zhdukurit vazhdon.
Një zëdhënës i Policisë së Kantonit Valais tha se autoritetet janë në kontakt të vazhdueshëm me familjet, dhe se ekipet e kujdesit ishin të pranishme për të ofruar mbështetje psikologjike.
Ende nuk është sqaruar se çka e shkaktoi zjarrin, por dëshmitarët kanë thënë se është shpërndarë me shpejtësi dhe ka shkaktuar kaos.
